London Universitet Kollecinin tədqiqatçıları koronavirus səbəbiylə eşitmə qabiliyyətini itirən bir xəstənin klinik vəziyyətini təsvir ediblər. Astma xəstəliyindən əziyyət çəkən 45 yaşlı kişi ağır COVID-19 diaqnozu ilə xəstəxanaya yerləşdirilib və mexaniki ventilyasiya tələb olunub. Xəstəyə dərman müalicəsi olaraq venadaxili remdesivir və steroidlər verildi.
Xəstənin vəziyyəti yaxşılaşıb və o, reanimasiyadan xəstəxanaya köçürülüb. Ancaq bir həftə sonra o, tinnitusdan – qulaqlarda cingiltidən şikayət etdi. Bir həftə sonra kişinin sol qulağı kar olub. Əlavə tədqiqatlar daxili qulaqın iltihabı nəticəsində yaranan sensorinöral eşitmə itkisini aşkar etdi. Steroidlərin köməyi ilə onun eşitmə qabiliyyəti qismən bərpa edilib.
Məqalə müəllifləri vurğulayırlar ki, xəstənin qəbul etdiyi dərmanların heç biri eşitmə itkisinə səbəb ola bilməz. Bundan əlavə, xəstənin əvvəllər eşitmə problemi olmayıb. Buna görə də vəziyyətin koronavirusdan qaynaqlandığı açıq-aydın görünür. İnfeksiyanın hansı mexanizmi işə saldığı hələ məlum deyil, lakin SARS-Cov-2-nin daxili qulaqın hüceyrələrinə nüfuz etməsi və onların ölümünə səbəb olması mümkündür. Başqa bir versiyaya görə, infeksiyaya cavab olaraq, bədən daxili qulaq üçün çox zəhərli olan sitokinlər istehsal etməyə başlayır. Bu fərziyyə iltihabı azaldan və sitokinlərin istehsalını azaldan steroidlərin effektivliyi ilə dəstəklənir.
Bu, İngiltərədə koronavirusla əlaqəli eşitmə itkisi ilə bağlı qeydə alınan ilk hadisədir, lakin oxşar simptomlar barədə əvvəllər məlumat verilmişdir. May ayında Mançesterdən bir qrup elm adamı 121 xəstədən 16-nın xəstəxanadan çıxdıqdan iki ay sonra eşitmə problemlərindən şikayət etdiyini göstərən bir araşdırmanın nəticələrini dərc etdi.
