Tədqiqat ötən ilin aprel-may aylarında pandemiyanın birinci dalğası zamanı, bütün dünyada məhdudlaşdırıcı tədbirlərin, o cümlədən sərbəst hərəkətə qadağaların tətbiq olunmağa başladığı dövrdə aparılıb. Sidney Universitetinin mütəxəssisləri Avstraliya, Kanada, Böyük Britaniya və ABŞ-dan olan 1500-dən çox insan arasında çox ətraflı sorğu keçiriblər. Tədqiqat həmçinin Əfqanıstan, Malayziya, Qırğızıstan, Tailand, Belçika və Serbiya da daxil olmaqla 30 ölkədən 103 respondenti əhatə edib. İştirakçıların gender nisbəti təxminən bərabər idi.
Tədqiqat zamanı könüllülər məhdudlaşdırıcı tədbirlərə nə qədər diqqətlə riayət etdikləri və onları qaydaları pozmağa vadar edən sualları cavablandırıblar. Onlar həmçinin intellekt səviyyəsi, koqnitiv refleksiya, adaptasiya, cəmiyyətlə qarşılıqlı əlaqə və digərləri üzrə bir sıra testlərdən keçiblər.
Nəticələr göstərdi ki, qadınlar kişilərlə müqayisədə bütün lazımi qaydalara daha məsuliyyətlə yanaşırlar: 92% və 86%. Tədqiqatçılar qeyd ediblər ki, bu tapıntılar ciddi xəstəlik epidemiyaları (SARS, donuz qripi) zamanı qadınların özlərini və yaxınlarını qorumaq üçün daha çox istəkli olduqlarını göstərən araşdırmalara uyğundur.
Respondentlərin təxminən 10%-i Covid əleyhinə profilaktik tədbirlərə məhəl qoymadıqlarını və özünütəcrid məhdudiyyətlərindən qaçmağa çalışdıqlarını söylədi. Tədqiqat müəlliflərinin fikrincə, sorğunun keçirildiyi bütün ölkələrdə bu rəqəm sabit olub və pandemiya kontekstində bu, çox mühüm rəqəmdir. Bu məlumatlar COVID-19-un ilk dalğası zamanı toplandığından, insanlar vəziyyətə daha yaxşı uyğunlaşdıqca və koronavirusu naməlum və təhlükəli bir şey kimi qəbul etmə ehtimalı azaldıqca, onlar daha da arta bilər.
Bəzi insanların özünütəcrid tələbinə məhəl qoymamasının səbəbləri bütün ölkələrdə təxminən eyni idi: dostları və ailəni görmək istəyi, cansıxıcılıq, dini inanclar və şəxsi azadlıqların məhdudlaşdırılmasına etiraz.
Çox vaxt məhdudlaşdırıcı tədbirlərə başqalarından daha çox özləri haqqında düşünən və rəsmi tibbi mənbələrə etibar etməyən ekstrovert kişilər məhəl qoymurlar. Bundan əlavə, bütün təhlükəsizlik tədbirlərinə riayət edənlərlə müqayisədə onların zəka və açıqlıq səviyyəsi daha aşağı idi. Ən təəccüblü kəşf isə o idi ki, bunlar heç də həmişə gənclər deyil – cinayət törədənlər əsasən orta yaşlı insanlar idi.
“Bu tapıntı, məhdudiyyətlərə məhəl qoymayan, COVID-19-a biganə qalan gənclər haqqında mediada tez-tez təbliğ olunan stereotipə ziddir” dedi.
Tədqiqat həmçinin müəyyən etdi ki, bütün qaydalara ciddi əməl edən və etibarlı mənbələrdən COVID-19 haqqında daha çox məlumat əldə etməyə çalışan insanlar məhdudiyyətlərin çətinliklərinin öhdəsindən daha yaxşı gələ biliblər. Alkoqol və psixoaktiv maddələrdən daha az istifadə edirdilər və ümumiyyətlə özlərini daha rahat hiss edirdilər.
