Tədqiqat Yuta Universitetinin Huntsman Xərçəng İnstitutu, Spenser Foks Ekkls Tibb Məktəbi və Boston Universitetinin Chobanian və Avedisian Tibb Məktəbinin alimləri tərəfindən aparılıb. Bu barədə JAMA jurnalında dərc olunub.
Əvvəlki tədqiqatlar endometrioz və yumurtalıq xərçəngi arasında səbəbli əlaqə olduğunu göstərdi. Və yeni araşdırmada elm adamları ilk dəfə müxtəlif endometrioz növlərinin və yumurtalıq xərçənginin alt növlərinin rastgəlmə nisbətlərini təhlil edə bildilər. Araşdırmada endometriozlu 78 mindən çox qadın iştirak edib.
Endometriozlu qadınlarda yumurtalıq xərçəngi riski endometriozsuz qadınlara nisbətən 4,2 dəfə yüksək idi. Yumurtalıq endometrioması və/və ya dərin infiltrasiya edən endometriozlu qadınlarda endometrioz olmayanlarla müqayisədə risk 9,7 dəfə yüksək idi. Endometriozun alt növləri ilə yumurtalıq xərçəngi histotipləri arasında əlaqə II tip yumurtalıq xərçəngi (yüksək dərəcəli seroz) ilə müqayisədə I tip yumurtalıq xərçəngi (endometrioid, şəffaf hüceyrə, selikli və aşağı dərəcəli seroz) üçün daha güclü olmuşdur.
Endometrioz nədir? Bu, endometrial hüceyrələrin təkcə uterusun içərisində deyil, həm də xaricində böyüməyə başladığı ümumi bir ginekoloji xəstəlikdir. ÜST-nin məlumatına görə, xəstəlik üç əsas formada özünü göstərir. Səthi endometrioz əsasən çanaq boşluğunun ətrafındakı selikli qişada müşahidə olunur. Daha ağır formalar yumurtalıqların içərisində endometrioma adlanan kistlər və yumurtalıqları, sidik kisəsini və bağırsağı təsir edən dərin infiltrasiya edən endometrioz kimi baş verir. Bu patoloji tez-tez xroniki ağrı və sonsuzluğa səbəb olur.
