Çox vaxt valideynlik ilə əl-ələ gələn yuxusuz gecələr və stress, həyatımıza illər əlavə edəcəyini düşündüyümüz şeylər deyil. Bununla belə, İsveçdəki Karolinska İnstitutundan bir qrup alimlərin bu yaxınlarda apardığı araşdırma nəticəsində məlum olub ki, uşaq sahibi olan insanlar heç vaxt uşaq sahibi olmayanlardan iki il daha çox yaşaya bilirlər.
Araşdırmanın nəticələri The Journal of Epidemiology & Community Health jurnalında dərc olunub. Doktor Karin Modiqin komandası milli reyestr məlumat bazasına müraciət edərək 1911-1925-ci illər arasında doğulmuş və İsveçdə yaşayan 704 481 kişi və 725 290 qadın haqqında məlumat toplayıb.
Alimlər bu insanların hər birinin ailə vəziyyətinə, ondan doğulan uşaqların sayına və hər bir uşağın cinsinə diqqət yetiriblər. Sonra onlar valideynliyin 60 yaşdan yuxarı hər bir insanın ömrünə necə təsir etdiyinə baxdılar.
Uşaqsız insanlarla müqayisədə ən azı bir uşağı olanlar daha gec ölürdü. Komanda təhsil səviyyəsi kimi digər amilləri də nəzərə aldı, lakin nəticələr eyni qaldı.
Tədqiqatçılar həmçinin, valideynlik və uzun ömür arasındakı əlaqənin yaşla artdığını aşkar ediblər. Həmçinin məlum olur ki, subay insanlar, xüsusən də subay kişilər valideynlikdən ən çox fayda əldə edirlər. Alimlər təklif edirlər ki, ortağın olmaması subay kişiləri qocalıqda öz övladlarına daha çox güvənməyə təşviq edə bilər.
Maraqlıdır ki, alimlər qrupu uşağın cinsinin ölüm riskinə təsir etmədiyini müəyyən edib. “Orta hesabla, qadınlar kişilərə nisbətən daha çox sosial əlaqələrə sahib olurlar və yaşlı uşaqsız insanlar, xüsusən də kişilər uşaqlı insanlardan daha az insanlarla ünsiyyət qururlar” deyə müəlliflər izah edirlər.
Alimlərin əsas qənaəti budur ki, yaşlı insanların uşaqları tərəfindən dəstəklənməsi uşaqlı insanların uşaqsız yaşıdlarından daha uzun yaşamasının səbəbi ola bilər. Bununla belə, valideynlərin uşaqsız insanlara nisbətən daha sağlam həyat tərzinə meylli olması kimi alternativ izahatları da istisna etmək olmaz.
