48 yapon universitet tələbəsi və məzununun iştirak etdiyi yeni araşdırmada alimlər kağız və planşet üzərində yazarkən beyin fəaliyyətini qiymətləndiriblər. Könüllülər qondarma personajlar arasında yaxın gələcəkdə fəaliyyətləri ilə bağlı dialoqu oxuyub, daha sonra planlarını qrafiklər şəklində yazıblar. Tədqiqatın müəllifləri onlardan səsyazmalarında eşitdiklərini mümkün qədər dəqiq şəkildə təkrarlamağı xahiş ediblər. İştirakçıların bir qrupu dəftər və qələmdən, ikincisi elektron planşetdən və qələmdən, üçüncü qrup isə smartfonda qeydlər aparırdı.
Bir saat sonra iştirakçılara qondarma personajlar haqqında müzakirələri nə dərəcədə yaxşı xatırladıqlarına dair bir neçə əlavə sual verildi. Daha sonra könüllülər qan axınındakı dəyişikliklər vasitəsilə beynin müxtəlif hissələrində fəaliyyəti ölçən funksional maqnit rezonans görüntüləmə (fMRI) istifadə edərək yoxlanılıb.
Araşdırmanın nəticələri göstərib ki, kağız üzərində qeydlər aparan iştirakçılar tapşırığı 11 dəqiqəyə, planşet istifadəçiləri 14 dəqiqəyə, smartfon istifadəçiləri isə 16 dəqiqəyə yerinə yetiriblər. Qələmlə yazanlarda elm adamları beynin dil yaddaşı və vizuallaşdırma ilə əlaqəli sahələrində, həmçinin bəzi yaddaş növlərinə cavabdeh olan hipokampusda aktivliyin artdığını aşkar ediblər.
“Bu fəaliyyət göstərir ki, kağız üzərində yazı daha sonra yaddaşda xatırlana biləcək daha çox məkan detallarını ehtiva edir. Eyni zamanda, elektron cihazlar standart naviqasiya və mətn formatlaşdırma alətləri ilə universal displey formasına malikdir”, – tədqiqatın müəllifləri yazır.
Alimlərin fikrincə, kağız üzərində yazmaq vacib məlumatları yadda saxlamaq üçün daha mürəkkəb, lakin daha faydalı vasitədir. Odur ki, nəyisə yazmaq və unutmamaq sizin üçün vacibdirsə, dəftər və qələmdən istifadə etmək daha yaxşıdır.
