Amerikanın “Challenge Success” təhsil təşkilatı NBC telekanalı ilə birlikdə ABŞ-ın 12 ümumtəhsil məktəbindən 10 mindən çox şagird arasında sorğu keçirib. Tədqiqata 2020-ci ilin yazından uzaqdan təhsil alan uşaqlar, həmçinin həftədə ən azı bir dəfə məktəbə getmək imkanı olan həmyaşıdları daxil edilib. Uşaqlar anketləri dolduraraq, onların psixoloji durumu, yuxu keyfiyyəti, akademik iş yükü, akademik göstəriciləri, müəllim və sinif yoldaşları ilə qarşılıqlı əlaqəsi ilə bağlı sualları cavablandırıblar.
Respondentlərin yarıdan çoxu 2020-ci ildə pandemiyadan əvvəlkindən daha çox stress hiss etdiyini bildirsə də, problem uzaqdan təhsil alan tələbələr arasında daha çox nəzərə çarpırdı. Onlayn təhsildə uşaqların 84%-i əsəb tükənməsi, baş ağrıları, yuxu problemləri və ciddi stressin digər əlamətlərini göstərib. Məktəbə getmək imkanı olan uşaqlar üçün bu rəqəmlər aşağı olub – 78%.
Uzaqdan təhsil alan tələbələr, hazırda dəstək üçün müraciət edə biləcəkləri böyüklərinin olmadığını söyləmək ehtimalı daha yüksək idi. Onlar həmçinin məktəbə gedən və müntəzəm olaraq müəllimlərlə ünsiyyətdə olan həmyaşıdlarından daha çox akademik performansdan narahat olurlar. Tədqiqat göstərdi ki, distant təhsil dərs yükünü əhəmiyyətli dərəcədə artırır: məsafədən təhsil alan uşaqlar orta hesabla ev tapşırıqlarına 90 dəqiqə daha çox vaxt sərf edirlər.
Ümumilikdə pandemiya təhsilin formatından asılı olmayaraq bütün məktəblilərə mənfi təsir göstərib. Belə ki, təhsilindən razı olmayan və onları mənasız məşğuliyyət hesab edən orta məktəb şagirdlərinin sayı pandemiyadan əvvəlki səviyyələrlə müqayisədə 48% artıb. Təhsilə maraq göstərmədiyini birbaşa bildirən yeniyetmələrin sayı da 12% artıb.
Bu məlumatlar 2020-ci ilin yazında Bristol Universitetinin mütəxəssisləri tərəfindən İngiltərənin 17 məktəbinin tələbələri arasında aparılan sorğunun nəticələrindən fərqlənir. Nəticələr göstərib ki, hər gün məktəbə getməmək uşaqların narahatlıq səviyyəsini orta hesabla 10% azaldır. Sorğu həmçinin oğlanlarda depressiya əlamətlərinin 2%, qızlarda isə 3% azaldığını göstərib.
Bundan əlavə, özünütəcrid zamanı yeniyetmələr məktəbə və müəllimlərə qarşı daha müsbət münasibət bəsləməyə başladılar. Bir çox tələbələr məktəbə pandemiyadan əvvəl olduğundan daha çox dəyər verdiklərini, oğlanlar isə müəllimlərin onlara daha diqqətli olduğunu qeyd etdilər.
