Avstraliyalı alimlər tədqiqatın erkən mərhələlərində baş və boyun xərçənginin diaqnozunda yüksək dəqiqlik nümayiş etdirən yeni nəfəs testi hazırlayıblar. Yeni araşdırma British Journal of Cancer jurnalında dərc olunub.
Tədqiqatda həkimlər tərəfindən baş və ya boyun nahiyəsinin hər hansı bədxassəli şişinin erkən mərhələlərində olduğundan şübhələnən 181 xəstə iştirak edib. Alimlər kütlə spektrometriyasından istifadə edərək tədqiqat iştirakçıları tərəfindən çıxarılan havanı təhlil ediblər. Onlar tərkibi müxtəlif xəstəliklərə xas ola bilən uçucu üzvi birləşmələrin (VOCs) xüsusiyyətlərinə diqqət yetirdilər.
Nəfəs testi alimlərə 80% hallarda xərçəng diaqnozu qoymağa kömək edib. Bu diaqnostik üsul xoşxassəli formasiyaları 86% dəqiqliklə müəyyən etməyə imkan verdi. Test nəticələri biopsiya ilə təsdiqləndi.
Tədqiqatçılar qeyd edirlər ki, bu tapıntıların etibarlılığını təsdiqləmək üçün daha geniş bir araşdırmada yoxlanılması lazımdır. Müvəffəqiyyətli olarsa, test klinik praktikada istifadə edilə bilər.
Son illərdə VOC aşkarlanmasına əsaslanan xərçəng diaqnozu üçün nəfəs testləri hazırlamaq üçün bir neçə cəhd edilmişdir. Onların köməyi ilə alimlər mədə xərçəngi, yemək borusu xərçəngi və ağciyər xərçəngini aşkar ediblər. Bir neçə növ xərçəng üçün diaqnostik test indi böyük bir klinik sınaqdan keçir.
