Yetkinlərin təxminən 30% -i vaxtaşırı, 10% -i xroniki olaraq yuxusuzluqdan əziyyət çəkir. Məlumdur ki, insanlar bu pozğunluğu müalicə etmək üçün getdikcə daha çox dərman istifadə edirlər. Həkimlər qısa kurslarda yuxu həblərindən istifadə etməyi məsləhət görürlər.
Onların effektivliyini təsdiq edən klinik tədqiqatlar bu günə qədər adətən bir ildən çox davam etməmişdir. Bununla belə, yuxusuzluq tez-tez xroniki bir xəstəlikdir, buna görə də bir çox insan illərlə yuxu həbləri qəbul edir. Yeni araşdırmanın müəllifləri qeyd edirlər ki, əvvəllər bu dərmanların uzunmüddətli qəbulu zamanı effektivliyi barədə elmi məlumat yox idi.
Yeni araşdırmada yuxu pozğunluğundan şikayət edən 42-52 yaşlı 600-dən çox qadın iştirak edib. Onlardan 238-i reseptlə yuxu dərmanları (zolpidem, zaleplon, eszopiklon), həmçinin antidepresan və narahatlıq əleyhinə dərmanlar qəbul edirdi. Qalan iştirakçılar yuxusuzluğa qarşı dərmanlardan istifadə etməyiblər.
İştirakçılar hər il yuxu keyfiyyətini beş ballıq şkala ilə qiymətləndirərək anketləri doldururdular. Alimlər müəyyən ediblər ki, iki ildən sonra müntəzəm olaraq yuxu həbləri qəbul edən qadınlar dərman qəbul etməyənlərə nisbətən əhəmiyyətli dərəcədə yaxşı yatmırlar.
Cənubi Kaliforniya Universitetinin professoru, həmmüəllif, doktor Raj Dasqupta, "Bu, artıq bildiyimizi vurğulayır – biz insanlara sadəcə dərman verib problemin öhdəsindən gəlmək üçün buraxa bilmərik".
Alimlər qeyd edirlər ki, bəzi hallarda yuxu həblərinin faydaları ardıcıl bir neçə il müşahidə olunsa da, xəstələrə hər halda dərmanların uzun müddət istifadəsinin faydasız ola biləcəyi barədə məlumat verilməlidir.
